في المقال دا هعرفك ازاي تختار شركة استضافة المواقع عشان ميضحكش عليك، وهعرفك شوية معلومات حلوين يساعدوك علي انك تختار الشركة المناسبة وانت مطمن وعارف ان الشركة دي هتوفيلك كل احتيجاتك الاساسية.

مبدائيا لازم تكون عارف حاجة، ان في شركات استضافة مواقع كتير جدا منها شركات عربية وشركات اجنبية والشركات العربية بيكون سعرها اغلي من الشركات الاجنبية عشان دي بتقدملك دعم فني عن طريق الواتساب وبيكون دعم فني مميز عن الشركات الاجنبية خصوصا لو عندك مشكلة في اللغة الانجليزية فالشركات العربية هتكون هي خيارك الافضل انما لو بتدور علي شركة كويسة بسعر رخيص فهتلاقيها في الشركات الاجنبية فقط.

وحتي لو شركة عربية عاملة باقات بسعر مخفض فالاستضافة دي منصحكش بيها خالص الا لو متوافق فيها الشروط الي انا هقولها بعد شوية عشان دي هتساعدك تعرف ازاي تختار شركة استضافة المواقع التي تلبي كل احتيجاتك الاساسية.

اية هي شروط اختيار شركة استضافة مواقع كويسة؟

مساحة الاستضافة

الشركة الي تقولك هديك استضافة مواقع غير محدودة من ناحية مساحة التخزين اعرف في الغالب انك هتلبس حيطة وان الشركة دي مش صادقة بنسبة كبيرة جدا، ولو اديتلك مساحة غير محدودة فعلا هتكون الاستضافة بطيئة جدا وهتقرفك وهتبوظ عليك شغلك عاجلا ام اجلا.